Jaco Kirsten 
Nadraai 

Op die oog af beskik die aantreklike, twee-en-vyftigjarige Rocco de Witt oor alles wat die lewe kan bied. Sy argitekspraktyk in Kaapstad begin opgang maak, hy is verloof aan die pragtige Duitse model Helga en hy woon in sy veelvlakkige droomhuis, daar tussen die bome in Higgovale. Maar oornag kom die besef dat jy die verlede se nawerking nooit kan ontsnap nie. Want in die Bosoorlog was Rocco ‘n formidable soldaat, verbonde aan 1 Valskermbataljon, en ná byna ‘n kwarteeu staan oudmakker Gert Malan voor sy deur . . . Die geweld van destyds, veral dít wat gebeur het tydens die aanval op ‘n Swapo-basis, kom opnuut Rocco se lewe binne. Sy welgeluksalige bestaan ontaard spoedig in ‘n nagmerrie en die spanning begin ondraaglik oplaai – tot die onvermydelike konfrontasie wat op hom wag, iewers tussen Ceres en Calvinia, op die plasie genaamd Nadraai.

Despre autor

Jaco Kirsten het bekendheid verwerf as skrywer van die ‘Van Alle Kante’-rubriek in Die Burger en was ook joernalis by publikasies soos Weg en Top Motor, daarna redakteur van Top Bike. Sy roman Om na ‘n wit plafon te staar het in 2009 verskyn. Tans woon hy in Denver, Colorado.