Multatuli 
Max Havelaar 
Est a nàrrere: Sas astas de su cafè de sa Cumpannia de Cummèrtziu olandesa

"Max Havelaar" est su contu de sas tribulias chi at passadu Eduard Douwes Dekker (Multatuli) cando fiat funtzionàriu in sas Ìndias olandesas.
Su domìniu coloniale olandesu in su sèculu XIX aiat promòvidu in cussas terras sos laòrgios de produtos chi daiant balàngios mannos in sos mercados europeos menguende a grae sas incùngias de s’arrosu, alimentu base de cussas populatziones, cajonende iscassia e fàmene. Su romanzu est una protesta e una denùntzia de sos tantos aprofitos e abusos chi sos dugones indìgenos, amparados dae funtzionàrios olandesos corrùmpidos, faghiant subra de sa populatzione, massajos e operajos, cun furas, ricatos e mortòrgios.
Cun dispraghere mannu de s’autore, su libru non fiat renèssidu luego a fàghere abbigiare sa cussèntzia tzivile e a cambiare sa polìtica coloniale de isfrutamentu e de opressione ma, mancari a sa lenta, aiat abertu su dibàtidu subra de sos tortos de su domìniu coloniale olandesu e de sos àteros Istados europeos.
In su 2002 sa Sotziedade Literària Olandesa at decraradu chi "Max Havelaar" est su romanzu olandesu prus importante de onni tempus.